საბასთვის დასახული მიზანი მხოლოდ ლამაზი ფიქრი არ არის; ის მიიჩნევს, რომ წარმატებისთვის აუცილებელია კონკრეტული გეგმის ქონა და მისკენ დაუღალავი სვლა. მას აქვს თვისება, რაც ბევრს არ გამოსდის: ცივი გონებით აანალიზებს საკუთარ შეცდომებს და მათგან სწავლობს.
მისთვის ყველაზე დიდი ავტორიტეტი და საყრდენი მამაა, რომელიც ყოველთვის აფასებს მის შესაძლებლობებს და გვერდით უდგას. საბას უკვე აქვს ამერიკაში, Model UN-ის დიდ აუდიტორიის წინაშე სიტყვით გამოსვლის მნიშვნელოვანი გამოცდილება. სწორედ მაშინ გააცნობიერა მთავარი — ხალხი მზადაა მოგისმინოს და შენი აზრი გაითვალისწინოს. გამორჩეული და ღრმაა მისი სურვილიც, რომ ერთი დღე ილია ჭავჭავაძესთან გაატაროს და ჰკითხოს, როგორ ეყო ძალა ქართველი ერის გამოსაფხიზლებლად.
ის ბეჯითი, შრომისმოყვარე და გლობალურად მოაზროვნეა, ამიტომ მისი ხედვებიც მასშტაბურია. საბას სურს, რომ საზოგადოება უფრო ერთიანი გახდეს, ადამიანებმა ერთად იმუშაონ გლობალური პრობლემების მოსაგვარებლად და მსოფლიო უკეთესობისკენ შეცვალონ. თავისი წვლილის შეტანას კაცობრიობის წინსვლაში კი ახალი ტექნოლოგიებისა და ინოვაციური აღმოჩენების შექმნით აპირებს, რაც ხალხს რეალურად დაეხმარება.
„ჩემი ყველაზე დიდი ოცნება არის რომ მსოფლიოს განვითარებაში და წინსვლაში ჩემი წილი შევიტანო, ხალხის დახმარებით, ახალი ტექნოლოგიების შექმნით ან ახალი აღმოჩენებით.“
მომავალს საბა ძალიან პრაქტიკულად უყურებს. ათი წლის შემდეგ, როდესაც უკვე შემდგარი პროფესიონალი იქნება, საკუთარ თავს პირველ რიგში იმას ჰკითხავს, მოუტანა თუ არა ამდენმა შრომამ და გეგმების რეალიზებამ შინაგანი ბედნიერება. ასეთი მყარი ღირებულებებისა და მკაფიო ხედვის მქონე ახალგაზრდას წინ ნამდვილად დიდი და საინტერესო მომავალი ელოდება.
